Agad na nagpaabot ng tulong ang Department of Social Welfare and Development Field Office 8 (DSWD FO-8) sa mga pamilyang naapektuhan ng sunog noong Pebrero 17 (Lunes) sa Brgy. 39, Calvary Hill, Tacloban City.
Nagbigay ang ahensya ng P10,000 sa bawat pamilyang may totally damaged house at P5,000 naman sa mga may partially damaged house, sharer, o boarder. Kasabay nito, naipamahagi rin ang relief items na binubuo ng 292 family food packs (FFPs), 415 bote ng 6.6L na tubig, at non-food items (NFIs) tulad ng 123 family kits, 169 sleeping kits, at 123 kitchen kits.
Bawat pamilya ay nakatanggap ng dalawang FFPs, tatlong bottled water, at tig-iisang family kit, sleeping kit, at kitchen kit. Samantala, isang FFP, sleeping kit, at bottled water naman ang ibinigay sa bawat sharer o boarder.
