Posted on

Usa nga malipayon nga bag-o nga tuig ha tanan!

Ginpatikangan han DSWD Sinirangan Bisayas an bag-o nga tuig pamaagi han padayon nga pagbulig ngan paghatag hin serbisyo ha mga nanginginahanglan.

Yana nga una nga semana han 2021, nagdumara an DSWD hin durungan nga distribusyon han P5,000 Emergency Subsidy han Bayanihan 2 ha Catbalogan City, Samar, kun ngain may-ada 8,000 nga kwalipikado nga mga benepisaryo para hini nga ayuda.

Ha pinaka-urhi nga ihap, nakapaghatag na an DSWD hin P108,020,000 nga ayuda ha 20,310 nga mga benepisaryo han Bayanihan 2 ha bug-os nga Rehiyon. Ginlalaoman han DSWD nga madako pa ini nga ihap samtang padayon an panhatag han Emergency Subsidy.

Padayon naman nga ginkaklaro han DSWD nga an Bayanihan 2 dire Second Tranche. Waray Second Tranche ha bug-os nga Sinirangan Bisayas tungod nga dire ini upod han mga lugar nga ginpailarom ha Enhanced Community Qurantine han ginpirmahan ni President Duterte an Executive Order 112.

Ginkaklaro gihap han DSWD nga an mga makakakarawat la yana an mga nakaukoy ha mga lugar nga ginpailarom han granular lockdown tungod han COVID-19. Amo ini an mga barangay, sitio, purok, karsada, zone o balay nga gintawag nga critical zone han Department of Interior and Local Government (DILG) ngan han Regional Inter-Agency Task Force (RIATF). Upod gihapon an mga waray pa makakakarawat han First Tranche.

Para han iskedyul han payout ha iyo tagsa-tagsa nga lugar, poyde makipag-istorya ha mga lokal nga mga opisyal.

#DSWDMayMalasakit